Афганистаны цорын ганц дипломатч эмэгтэй алт хууль бусаар хил давуулсан дуулианы улмаас огцорлоо

Закиа Вардак бол Афганистаны цорын ганц эмэгтэй дипломатч бөгөөд 2021 онд Мумбай дахь Ерөнхий консулаар томилогдон ажиллаж байв. Өнгөрсөн долоо хоногт тэрээр Дубайгаас Мумбай руу нисэхдээ их хэмжээний алт хууль бусаар нэвтрүүлэх гэж байгаад саатуулагджээ. Харин өчигдөр Закиа Вардак албан тушаалаасаа огцорч буйгаа зарлав. Тэрээр өөрийг нь зайлуулах зорилготой зохион байгуулалттай ажиллагааны золиос болсон хэмээн мэдэгдэлдээ дурджээ. Мөн сүүлийн нэг жилийн хугацаанд өөрөө болон ойр дотныхны эсрэг халдлага, гүтгэлэгт өртөж байсан тухайгаа онцолсон байна. Закиа Вардак өөрт тохиолдсон энэхүү үйл явдлыг Афганистаны эмэгтэйчүүдийн тулгарч буй нийгмийн хүнд сорилтуудын нэг хэмээн тодорхойлжээ. Одоогоор Талибаны засгийн газраас энэ талаар ямар нэгэн тайлбар өгөөгүй байна.